ဖျက်သိမ်းပြီး အမျိုးသားဒီမိုကရေစီအဖွဲ့ချုပ်ပါတီ ရဲ့  "ကိုယ်ပိုင် ပြဌာန်းခွင့် ဥပဒေအရ မဲမပေးဘဲ နေနိုင်တယ်" ဆိုတဲ့ စာသားပါ တီရှပ်ဝတ်လူငယ်တွေ ရန်ကုန်မြို့ပေါ်က လမ်းတွေအပေါ် သွားလာနေခဲ့ကြအပြီးမှာ ယခုတဖန် "I vote (မဲပေးမယ်)” ဆိုတဲ့ စာသားပါ တီရှပ်ဝတ်လူငယ်များ ပေါ်ထွက်လာပြန်ပါတယ်။
ယခင် ရက်ပိုင်းများက ဖျက်သိမ်းပြီး အမျိုးသားဒီမိုကရေစီအဖွဲ့ချုပ်ပါတီက လှုပ်ရှားတဲ့ “ No vote (မဲမပေးရေး)” အုပ်စု ပေါ်ထွက်လာတာဟာ မိမိတို့အတွက် ပိုပြီး အားကောင်းသွားစေတယ်လို့ "မဲပေးရေး ( I Vote )အုပ်စုဝင် တဦးက ဆိုပါတယ်။
“မဲမပေးဘဲနေနိုင်တယ် ( No Vote ) တီရှပ်တွေ ၀တ်ပြီး မြို့ထဲသွားရင်လာရင် ဘယ်အချိန် ဆွဲ အစိ ခံရမလဲ လူတွေက ၀ိုင်းကြည့်ကြတယ်။ သူငယ်ချင်းတချို့ကို ပေးဝတ်တာ သူတို့ ၀တ်ဖို့ ကြောက်ပြီး စိုးရွံ့နေကြတယ် " ကျနော်တို့က ရှင်းပြရတယ်။ ဒါဟာ နိုင်ငံသားတစ်ယောက်ရဲ့ လူ့အခွင့်အရေးကို ပိတ်ပင်တားဆီးတဲ့ လုပ်ရပ်တခုဖြစ်တဲ့အတွက် ပြည်သူတွေလိုလားတဲ့ ဒီမိုကရေစီ နဲ့ ဆန့်ကျင်နေတဲ့ လုပ်ရပ်ပဲလို့ လမ်းသွား လမ်းလာ ပြည်သူများကို ရှင်းပြရတယ်။ ပြည်သူတွေ ကြုံကြိုက်လာတဲ့ အခွင့်အရေးတရပ်နဲ့ ဆန့်ကျင်နေတဲ့ လုပ်ရပ်ကို လုပ်နေတာတောင် မဖမ်းဘူးဆိုတော့ I vote အဖွဲ့က အခုလို ၀တ်ပြီးထွက်လာတဲ့အခါ ( I vote ) မဲပေးမယ် ဆိုတဲ့ တီရှပ်ကို ၀တ်ဖို့ ဆိုရင်တော့ ဘယ်ကောင့်ကိုမှ ကြောက်စရာ ဂရုစိုက်စရာတောင် မလိုတော့ဘူးပေါ့။ လမ်းသွား လမ်းလာပြည်သူတွေမှာ စိုးရိမ်စိတ်တွေ မရှိကြတော့ဘူး"လို့ သူက ပြောပါတယ်။
လူတွေရဲ့ မဖမ်းပါလား ဆိုတဲ့ စိုးရိမ်စိတ်ကို ဖယ်ရှားပေးလိုက်တာဟာ No vote အဖွဲ့ရဲ့ လှုပ်ရှားမှုပဲ ဖြစ်တယ်လို့လည်း သူက သုံးသပ်ပြပါတယ်။
“အများပြည်သူတွေရဲ့ အခွင့်အရေးကို ပိတ်ပင်တားဆီးနေတဲ့ လုပ်ရပ်ကိုတောင် မဖမ်းဘူး ဆိုတာ လူတွေ သိသွားကြပြီ။ သိသွားတဲ့ အတွက် ကျနော်တို့ သူငယ်ချင်းတွေဆိုရင် I Vote ( မဲပေးမယ် ) ဆိုတဲ့ တီရှပ်တွေ သူတို့လည်း ၀တ်မယ်ပေးပါဆိုပြီး လာတောင်းလာကြပြီ"လို့ သူက ဆိုပါတယ်။
I Vote တီရှပ်တွေကို လူငယ်တစုက သူတို့ကိုယ်ပိုင် ငွေကြေးနဲ့ စာသား ရိုက်နှိပ်ဝတ်ဆင်နေကြတာဖြစ်ပြီး လိုလားသူတွေကို ပေးဝေဖို့ဆိုရင်တော့ အလှူရှင်တွေ ရှိမှ ဖြစ်ပါလိမ့်မယ်လို့ သိရပါတယ်။
“လှူမယ့်လူတွေရှိလာရင်တော့ တီရှပ်တွေ ပိုပြီး ပေးဝေနိုင်ပါလိမ့်မယ်။ လူတွေကလည်း ၀တ်မှာဗျ။ No Vote အဖွဲ့ကို ကြည့်ပြီး သူတို့ မကြောက်တော့ဘူး။ No vote အဖွဲ့ဆိုတာက ပါတီမညီမညွတ်ပဲ ပြိုကွဲသွားရတဲ့ လူ တစုလေးပဲလေ။ ပါလီမန် ဒီမိုကရေစီ ခေတ်ကလို အကွဲအပြဲဇာတ်လမ်းတွေ လူပုဂ်ဂိုလ်စွဲတွေကို ရွံ့မုန်းနေသူတွေက တနိုင်ငံလုံးဗျ။ ဒို့အရေးအော်စရာမလိုဘဲ။ တီရှပ်လေးဝတ်တာနဲ့ ကိုယ့်ဆန္ဒကိုယ်ဖော်ထုတ်ခွင့်ရမယ်ဆိုရင် သူတို့ လိုက်ဝတ်ကြမှာပဲ"လို့ မဲပေးမယ် အုပ်စုဝင် လူငယ်က ရှင်းပြပါတယ်။
မဲမပေးဘဲနေနိုင်တယ်အုပ်စုကို ရန်ကုန်မြို့ခံ လူငယ်တစုနဲ့ ဖွဲ့စည်းထားတာလို့သာ သိရှိရပြီး ဘယ်သူတွေ ပါဝင်တယ်။ ဘယ်နှစ်ဦးပါတယ်ဆိုတာ မသိရသေးပါဘူး။ ထိုနည်းတူပါပဲ I vote မဲပေးမယ်အဖွဲ့ဟာလည်း ဘယ်သူတွေနဲ့ ဖွဲ့စည်းထားတယ် ၊ ဘယ်သူတွေက ကျောထောက်နောက်ခံပြုပေးထားတယ်ဆိုတာကိုလည်း မသိရသေးပါဘူး။
No comments:
Post a Comment